Les grands
classiques

Poésie Française : 1 er site français de poésie

Les grands<br>classiques

Jean DORAT
1517 - 1588

Sur la louange de la Paix - Sonnet 3

Ce que force ne peult par main forte parfaire,
Prudence le parfaict par un sage conseil :
Qui comme tout le corps est guidé par son oeil,
Ainsi du corps public doibt conduire l'affaire.

La guerre et les guerriers en dix ans n'ont sceu faire
Aians faict trebucher tant de gens au cercueil,
Que tout le peuple en ung recongneust son Soleil :
Ce qu'en brief nous a faict une Paix debonnaire.

L'un et l'autre party estoit desja si fort
Qu'on n'en pouvoit cheuir par belliqueux effort,
Mais CHARLES en cedant tu as eu la victoire.

Victoire tres heureuse où nul des tiens n'est mort,
D'où il ne reste rien qui au cueur te remord,
Fors un contentement d'une éternelle gloire.